انطــر الفــرج :|

السلام عليكم ورحمه الله وبركاته

الحين الساعه 10 الا 10

مشكلتي فيني النوووم بشكل مو طبيعي

قاعده من الساعه 6 الصبح عشان الدوام بعدها طلعت الساعه 2:20

كالعاده رحت امر عصير كيفان اللي عند الجمعيه ورا النادي

ترى لذيييييذ

توني هابه فيه قطعنا عوار قلب مؤقتا فقط ولا مالنا غنى عنه

المهم الساعه 2:45

ماتسوى ارجع البيت لانه عندي موعد مع دكتورتي عالساعه 4:30

واعرف عمري اذا رديت بحط راسي وانام واحقر

فقررت اقضي اشغالي المتراكمه بسبب هالدوام

جان امر اختي ما قعدت عندهم بس خذيت منها غرض

صارت الساعه 3:15

امممم مادري شسوي

العياده قريبه من بيت اختي

احس اني تعبت من السياقه بس ماقدر انزل عندهم لانه هالحزه ينامون وهم مالي خلق لانه بعد اذا قعدت ماراح اطلع :s

خــــلاص احس ابي انــــــــــــام دخت من الفراره وخاصه اني مو متعوده على جذي !!!!

ماكو غير حل واحد

كملت ورحت العياده على ما وصلت الساعه 3:30

تقريبا باقي ساعه

سفطت صوب الظل طبعا :p

لبست النظاره الشمسية لغرض مافي نفسي XD

قفلت بيبان السياره

احم احم

وحاولت اخذ غفوه

بس للاسف تسلط النوم وجافاني :"\

لسببيــن

الخوف من المجهول كل ساعه احاتي لاحد ينتبه ولا شي

والمكان مو مريح كلش

فقلت هم ما تسوى علي خلاص خلاص ماكو الا اشغل نفسي بشي ثاني

دورت على شي اسمعه بالسياره ماكو كل اللي موجودين سامعتهم مليون مره

جان اتذكر ان هاليومين كنت انزل على موبايلي

سلسله تاريخ فلسطين حق طارق السويدان

لبست السماعات وشغلته

حـــــــــــــــــــــــــيـــــــــــــــــــــل اندمجت ونسيت الوقت واهم شي صحصحت

مدته كانت ساعه وربع

وصلت نهايته ولا اشوف ان موعدي خلاص قرب والمفروض اكون نازله عندهم :D

ضاق خلقي لانه اضطريت اصكه

المهم

دخلت العياده

قعدت انطر ولاتقولي الموظفه

الدكتوره شوي بتأخر نطري

بيني وبينكم استانست وتضايقت

قلت الحمدلله عشان اكمل شصار على هيكل سليمان واليهود :P

وتضايقت لانه مليت :S

رديت شغلت طارق السويدان وكملته

والحمدلله خلص قبل لا اتيي الدكتوره :D

طلعت من العياده تقريبا 6 :\

امبيــه مو متخيـــله

معقوله 12 ساعه متواصله برا البيت لالالالا ما اتحمل :\

وصلت البيت عالـ 7 من الزحمه ماشاءالله

احس نفسي تعبت جسديا ونفسيا " اخيتكم بيتوتيه" قعدت مع اهلي اقاوم النوم

تعشيت خفايف

حاولت اروح اشوف مباراة الكويت واشجع مع المشجعين بس مافيني طاقه :P

الحين بتقولون شنو الغرض من الموضوع

الغرض الله يسلمكم قاعده اكتب اي شي والهي عمري

عشان هم اقاااوم النوم وما انام مبجر لانه اذا نمت هالحزه راح اقعد الساعه 2 بليل

.

ومالي خلق سوالف افلام الرعب اللي اسويها وافكر فيها تالي الليل

:s

.

فعشان جذي مضطره يا نفسي اعذبج معاي الى الساعه عالاقل 11 وبعدين روحي نامي كيفج

,

XD

,

وبس سلامتكم

يوم من يومياتي

صج النوم سلطان -__-

Sorry Im On DieT !!

السلام عليكم ورحمه الله وبركاته

اييييه البنات والريجيم !!!

والله هالموضوع متعبني :\.

صارلي دهر اقول ابي اسوي ريجيم وسوينا هالريجيم وكثر ماقدرت كنت ملتزمه فيه

.صج اني اكرهه التقييد بالاكل مع اني الحمدلله انسانه مو اكوله بس تقريبا اكلي كله خرابيط مو صحي كلش وهم قلت يلا نحافظ ونضعف شويه

اول شي رحت عند دكتوره وعطتني لستة شنو اكل خلال اسبوعين وبعدين موعد اشوف جم نزلت طبعا يا كيلو يا نص كيلو

ووقتها كان ايام الشتا وطلعات البر اللي ماشاءالله انواع الاكل والحركات يعني انجبر اشوف كل هذا وما اكل نووو وييي ماقدر :p

حسيت كلش مو قادره التزم معاها وقلت خلاص ماكو غير ادش نادي

دشينا هالنادي قعدت شهر وماقدرت اتحمل

لانه دوامي " راح اقوله قصتة يوم من الايام " ونادي صعبه :

هم ما كملت ووقفت النادي صج ضعفت حزتها وكنت احس بنشاط

بس ماكنت مرتاحه

:s

قلت ماكو الا اجرب الشركات الي يبوون الاكل لي البيت

هم اشتركت لمدة شهر وصج ضعفت مو وايد وايد تقريبا كيلو ولا كيلويينXD

وماكلمت لانه الاكل صار يتكرر وماله طعم :\

.مع كل هذا حسيت اني مو مستفيده شي وماوصلت للي ابيه

وكنت دايما احس باكتئاب بسبب الحرمان والتعذيب نشوف الاكل وما ناكل :p

والله صكت فيني الدنيا

فقررت اقطع هالنظام وجميع انظمة الريجيم

وافتكيت من همهم خلاص اللي بيصير يصير :\

بس سبحان الله كان لها تأثير يعني من غير ماحس صار اكلي خفيف جدا واهم شي اكلي ظل صحي الحمدلله :p

وامس خالتي يتنا وصارلها فتره مو شايفتني جان تقولي

شفيج صغرانه جذي ^__________^

يا فرحتي صج وايد قمت اسمع ناس تقولي حيل ضعفانه وشمسويه بعمرج وشنو ريجيمج

احم احم

ريجيمي اهوه

اكل كل شي بخاطري ماخلي شي والله

بس بكميه قليله جدا " لقيمات يعني "

+

عشاي يكون مبجر حدي 7 واذا يعت شي خفييف نص تفاحه

+

مشي :)

والحمدلله حتى نفسيتي اتينن عكس لما كنت ملتزمه ومجبوره بنظام معين صج احس روحي جني محرومه :

والحمدلله على كل حال :)

مجـرد سؤال !!

السلام عليكم ورحمه الله وبركاته

سؤالي :

ليش بدوامي ماقدر ادخل على البلوقر @@

اتوقع مانعين دخول الموقع مع اني ما شوف فيه شي عــــادي ؟؟

في احد نفس حالتي ولا بس انا :P

مازلت اشتاق لهم :"\

السلام عليكم ورحمه الله وبركاته

الحين احنا بنهاية الكورس وبنبدي امتحانات الفاينل ان شاءالله " عسى الله يوفق الجميع " .. وبهالمناسبه قررت اني ارتب غرفتي عشان اقدر ادرس <-- معجزه ;P
المهم وانا انظف وحالتي حالة ولا القى ورقة مكتوبة بخط وااايد حلو ومقسمه الى 4 اقسام .. هالورقة لها ذكرى غاليه على قلبي وصارلها تقريبا 6 سنين من ايام الثانوية
قعدت اقراها و العبره خانقتني :-(

بكتبلكم محتوى الورقة اول شي وبعدين بقولكم قصتها..

العنوان :

- واحة إيمانية –

جاء رجل الى الحسن البصري يسأله:
ما سر زهدك في الدنيا؟
فقال : اربعة اشياء.
-علمت أن رزقي لن يأخذه غيري فاطمئن قلبي
- علمت أن عملي لا يقوم به غيري فأشتغلت به وحدي
- علمت ان الله مطلع علي ، فاستحيت أن يراني على معصية
- علمت ان الموت ينتظرني ، فأعددت الزاد للقاء ربي ...

* فرص عظيمة *

إذا أردت أن ------------------> فقولي
- يكون لك كنز في الجنة --------------> لا حول ولا قوة إلا بالله
- تغفر ذنوبك وإن كانت مثل زبد البحر ------> سبحان الله وبحمده ( 100 مره)
- تغرس لك نخلة في الجنة -------------------> سبحان الله

هل تعلمين ؟؟!

- أن ما يمحو الله به الخطايا ويزيل به السيئات هو ............ الصلاة
- أن عمود الاسلام وركنه الذي لايقوم الا به هو ............... الصلاة
- أن أول ما يحاسب عليه العبد يوم القيامة هو ................... الصلاة
- أن آخر ماوصى به رسولنا الكريم صلى الله عليه وسلم هو ... الصلاة

الحسنة والسيئة

قال ابن عباس رضى الله عنهما :

" إن للحسنة ضياء في الوجه ونورا في القلب ... وقوة في البدن وسعة في الرزق .. ومحبة في قلوب الخلق ..
وإن للسيئة اسوداداً في الوجه وظلمة في القلب .. ووهنا في البدن ونقصاّ في الرزق .. وبغضاً في قلوب الخلق .."

هذا ما كُتبَ فيها .. ربما البعض لا يجدُ فيها شئ مؤثر .. مع انها مليئة بالقيم والدرر ...
ولكن ماجعلها غير عاديه وعزيزه على قلبي و سبب احتفاظي بها هم الصحبة اللاتي كنت معهم .. فتيات مراهقات صغيرات اعمارهم بين 15 – 17.. ولكنهم لم يكونو كأي مراهقات .. لم تكن أهم اهتماماتهم المظاهر والشكليات وحب المشاهير وغيرها من قصص الصغيرات وإنما ...
في وقت الفراغ والفرص تجدونهم في مسجد المدرسه.. إما انهم يحفظون القرآن او انهم يخططون ويرتبون لعمل حملات في المدرسه عن الحجاب او الصلاة وغيرها أو يتحلقون و تلقي عليهم الدرس احدى الفتيات " اهيه نفسها اللي كتبتلي الورقه" ... همهم فقط دينهم قبل دنياهم .... لا اعلم كيف اصف لكم مشاعري وانا بينهم فوالله كانو نِعمَ الصحبه غيروني للافضل .. أجدهم دائما عندما احتاجهم واكون في قمة سعادتي وانا معهم...

جو ايماني.... شعور لا يوصف.... ذكريات لا تنسى

"اذا ما صحبت القوم فاصحب خيارهم ولا تصحب الاردى فتردا مع الردي"
"المرء مع دين خليله فلينظر احدكم من يخالل"

والله انــــــي افتقـــــــــدهم

يارفيق الدرب إني .. أذكُرُ الفُضلَ وأُثني ...
إنها لحظةُ شكرٍ ...وامتناني لكَ مني...
كم حملتَ الهم عني عندما كَلَت يميني
ولكم أزرتني في أمرِ دُنيايا وديني...
إنما يُجنى الهدى من صحبةِ الخلِ الامينِ
من يَسر في الروض يستنشق عبير الياسمينِ
يُوزَنُ المرءُ بمن صاحب واختار وليا
وانا اخترتُكَ فأزددت رقيا ورقيا

اجتيـاحـ صمتـ

24-5-2006

**يا الله

اليوم صادف 24-5-2008

وماكتبته كان في تاريخ 24-5-2006

والله لم انتبه الى ذلك الا في هذه اللحظه :)

xDيامحاسن الصدف

ربما في كل عام من هذا اليوم والشهر

اشعر بالحنيـــن اليهـــــم :")

الالـــحـاد :@ :@

السلام عليكم ورحمه الله وبركاته

.

اخ هاليومين قاعده اسمع واشوف اشياء يشيب منها شعر الراس

الناس شفيهم استخفوو

!!!

شقاعد يصير بهالدنيا ؟؟؟ لا يكون صج احنا بأخر الزمان !!

.

لا حول ولا قوة الا بالله

.

خلصنا من موضه البويات ومشتقاتها

.

يتنا الحين موضه الالحاد.. حسبي الله ونعم الوكيل

.

الواحد فيهم بس ياه شويه شك بدال لا يبحث ويقرا عشان يعرف الرد على هالشك

.

لا على طول زاد وكبر وتمكن منه الشيطان وخلاه يقلب ملحد !! اعوذ بالله

.

واذا قلت يا فلان السؤال اللي عندك رده سهل اقرا الكتاب الفلاني

ولا اسأل الشيخ يجاوب عليك

...

يكون جوابه والله ماقدر ولا مابي

!!

لا حول ولا قوة الا بالله

يعني لو نقول هالكلام يطلع من شخص واحد ممكن بس هالموقف وايد تكرر جدامي للاسف

: (

استغفر الله واتوب اليه

هالغزو الفكري اللي قاعد يصير لنا خلنا ننسى هويتنا ودينا وعاداتنا وانبهارنا بالغرب زادنا ضياع

سؤال : ودي اعرف جوابه من هالنوعيه

ليش اذا ياكم شك لو بسيط ما تلجؤوون للكتب ليـش ما تعبون نفسكم دقيقه بس وبتعرفون الرد ! ؟؟

اللهم يا مقلب القلوب ثبت قلوبنا على دينك

اللهم يا مقلب القلوب ثبت قلوبنا على دينك

اللهم يا مقلب القلوب ثبت قلوبنا على دينك

غفـــلــــه

قلبي

احتضنه الحزن

قلبي

ضاقت به الدنيا

قلبي

اثقلته الهموم

قلبي

تملكته الغفله

يا قلب ما الذي ابعدك عن الطريق

اهي الذنوب؟؟

وما غيرها !! ؟

فقد اثقلت كاهلي وضج قلبي بها

يارب

يارحمن ارحمني واغفرلي

ياكريم اكرمني بعفوك

يارب

غفلتي طالت واتعبتني

أريد الرجوع

رباه اشتقت لمناجاتك

فلا تحرمني منها

:(

ادعولي

خوف عميق

في هذه اللحظه

افضل ان التزم الصمت

مللت الكلام

مللت من الاصغاء

مللت ممن حولي

مللت من كل شي امر به

مللت حياتي

احاول التغيير .. احاول ان الملم شتات نفسي

ماذا يحدث لي ؟؟

لم اكن يوما ملوله

او حتى احس بهذه اللامبالاة لمن حولي

اعلم انهم يحبوني ويتمنون كل خير لي

ولكن كل ما اريده اناسا يصغون فقط

فهم يعلمون اني اجيد فن الاصغاء

وعندما احتجت لاحد ان يصغي لي

لم اجد فيهم من يجيده !!

مشاعر متناقضه امربها

احبهم ولا ابالي بهم

احتاج لهم وابتعد عنهم

حزن يتملكني ولا استطيع كسره

مللت من الانتظار والتفكير

اريد العوده لما كنت عليه

نفسي

كم افتقدتك واحتاج لك

:(

اعلم انها خربشات ولكن لاول مره اقوم بتدوين مشاعري

فدائما ما كنت احتفظ بها بصندوق صغير داخل قلبي واقفل عليه

لاني ببساطه اخاف التعبير عنها

اجتياح صمت